संखुवासभा । काठमाडौको गोकर्णेश्वरमा निर्माणाधिन संखुवासभा भोटे गुम्बालाई खाँदबारी नगरपालिकाले आर्थिक सहयोग गरेको छ ।
आदीवासी, जनजाति, भोटेसमूदायको इतिहास, पहिचान, कला, संस्कृतिको संरक्षण गर्ने उद्धेश्य अनुरुप खाँदबारी नगरपालिकाले ५० हजार रुपैया सहयोग गरेको हो । खाँदबारीबाट काठमाडौ पुगेर प्रमुख महेश थपलियासहितको टोलिले गुम्बा निर्माणको अवलोकन गर्दे आगामी दिनमा पनि सहयोग गर्ने प्रतिबद्धता जनाएको हो ।
भोटे समूदायले आफ्नो गुम्बा निर्माणकालागि स्वस्फूर्तरुपमा श्रमदान पनि गरी रहेको छ । हिमालय भोटे समाज काठमाडौका अध्यक्ष मिथुन भोटे र निर्माणाधिन श्री संखुवासभा भोटे गुम्बाका अध्यक्ष ताप्चेन भोटेले गुम्बाको पहिलो तला ढलाईको काम सकिएको र ग्याल्पु ल्होसारको कार्यक्रम संखुवासभा भोटे गुम्बामा भव्य रुपमा मनाउने तयारी भई रहेको जानकारी दिए ।
भोटे समूदायको गुम्बा निर्माणले मूर्त रुप लिने भएपछि यस समूदायमा खुशीयाली पनि छाएको छ । भोटे गुम्बा निर्माण जस्तो पवित्र काममा अगडी बढेको भोटे समूदायको यो गुम्बा निर्माणमा स्वस्फूर्त रुपमा सहयोगसमेत जुटी रहेको बताइएको छ ।
