संखुवासभा । खाँदबारी नगरपालिकाले नगर क्षेत्र भित्रका पाँच बर्षमुनीका बालबालिकालाई दादुरा रुबेलाको खोप लगाउन अभियान नै संचालन गर्ने भएको छ ।
बुधबार खाँदबारी नगरपालिकाको सभाहलमा सरोकारवालालाई निमन्त्रणा गरि अभियान बारे जानकारी दिइएको हो । नगरपालिकाले वडास्तरिय खोप समन्वय समितिलाई अभिमुखिकरण कार्यक्रम समेत सम्पन्न गरिसकेको जनाएको छ ।
जिल्लाभर नै दादुरा रुबेला खोप सफल पार्न अभियानको रुपमा संचालन भईरहँदा खाँदबारी नगरपालिका पूर्ण रुपमा तयारी अवस्थामा पुगेको जनाएको छ । नगरभित्रका कोही पनि ९ महिना देखि ५९ महिना अर्थात ५ बर्षमुनीका दुई हजार ७ सय ४९ जना बालबालिकाहरु दादुरा रुबेला खोप लगाउनबाट बञ्चित नहोस भनेर अभियानकै रुपमा संचालन गरिएको खाँदबारी नगरपालिकाका मेयर महेश थपलियाले बताए ।
खाँदबारी नगरपालिका भित्रका ११ वटा वडाको ४५ वटा केन्द्रमा यहि फागुन २७ गते देखि चैत्र २ गते सम्म ६ दिन खोप केन्द्र तोकीएको खाँदबारी नगरपालिकाका स्वास्थ्य संयोजक दिलिप श्रेष्ठले जानकारी दिए । उनले अभियान सफल पार्न सबैले हातेमालो गर्न समेत अपिल गर्दै खबर र प्रचारप्रसार गरिएको बताए ।
संखुवासभा जिल्लाभर १३ हजार १४८ जना नौ महिना देखि पाँच बर्षमुनीका बालबालिकाहरु रहेका छन् । उनीहरुलाई एकैसाथ खोप अभियान अन्तर्गत लगाइने तयारी रहेको छ ।
