संखुवासभा । जिल्लाको खाँदबारी नगरपालिका–५ माल्टामा शुभदिपावली (तिहार) र छठ पर्वको अवसरमा भलिवल तथा नृत्य प्रतियोगिता हुने भएको छ ।
ओडारे सिंहदेवी सामुदायिक वन उपभोक्ता समितिको आयोजनामा टोलस्तरीय भलिवल प्रतियोगिता र खुल्ला नृत्य प्रतियोगिता आयोजना गरिएको कार्यक्रम संयोजक धनबहादुर सुवेदीले बताए । उनको अनुसार, कात्तिक ३० गते देखि मंसिर ३ गते सम्म कार्यक्रमको आयोजना गरिएको छ ।
टोलस्तरीय भलिवल प्रतियोगितामा खाँदबारी नगरपालिका वाड नम्बर ५ र ६ भित्रका टोलहरुले मात्रै सहभागीता जनाउन पाउनेछन् । प्रथम पुरस्कार नगद २० हजार, मेडल र प्रमाणपत्र रहेको छ भने दोस्रो पुरस्कार नगद १० हजार, मेडल र प्रमाणपत्र, तेस्रो पुरस्कार नगद ५ हजार, मेडल र प्रमाणपत्र रहेको छ ।
त्यसैगरि खुल्ला नृत्य प्रतियोगिता तर्फ प्रथम पुरस्कार नगद ५ हजार र प्रमाणपत्र, दोस्रो नगद ३ हजार र प्रमाणपत्र र तेस्रो पुरस्कार २ हजार र प्रमाणपत्र रहेको छ ।
०५२ सालमा स्थापना भएको सामुदायिक वनद्धारा आयोजित कार्यक्रम सामुदायिक वनको खेलमैदान माल्टा पुच्छारमा हुने आयोजकले जनाएको छ ।
